الامتلاك ...عدم التقدير...الاحتياج...الِضغط النفسي...الغيرة والشك ... التطبيع .... الملل
دول السبع أعداء للحب (من وجهة نظر الكاتب)
الاحترام ... الاحتواء....الصراحة...التضحيات... الصفقة
دول الخمس عناصر لاصلاح اى مشاكل في المشاعر
(من وجهة نظر الكاتب)
الحب... الحياة... الحزن.... الفرح ... الأمل .... اليأس...
الحب.... الحب... الحب
هذا هو موضوع رواية "هيبتا" بكل ما فيها
ومش لازم الحجات دي تنطبق على الحب بس اللى يبقى بين الولد والبنت يعنى ممكن تبقى مشاعر حب بين الاصدقاء او الاخوات
بطل الرواية ستشعر انه فيه جزأ من كل واحد فينا
كلنا مرينا بمرحلة او مرحلتين من القصة وفي مننا اللى مر بكل المراحل، تحس انها بتحكي عنك قوي
1- القصة عميقة،
معظم القصص الرومنسية مثلما قال محمد صادق يكتفي بارتباط البطل بالبطلة، وبكدة بقى تنتهي كل المشاكل ، لكن القصة بتقول ان الارتباط هو بداية المشاكل، وان الافلام العربي دايما بتخلى مشاكل الاحباء خارجية ان في حد بيفرق بينهم وأول ما الحد دا يمشي او ربنا يهده المشاكل كلها تنتهي ، لكن المشكلة الحقيقية فينا احنا، العائق الوحيد بيبقى مننا احنا
2- لو الحب دا مدينة، فان معظم الافلام والقصص الرومانسية فتحت الباب وجريت، انما الرواية دي دخلت بقلب جامد ولفت المدينة وجابتها من اولها لآخرها وخرجت من الباب الوراني منغير خوف، يعنى الرواية دي وصفت الحب بكل مراحله بكل دقة وبكل عمق ووصلت لمعميق معميق الانسان .
3-كدبة ان الحب الاول هو الحب الاخير دي ، قدمت قوي خلاص، الرواية بتعالج ان الواحد ممكن يمر بتجارب كتير في حياته ودا مش ضد الحب بالعكس بيخليك تعرف انت هتستريح مع مين في الآخر، وانت محتاج ايه فعلا الحب كذا مرة بيخليك تفهم الحب قوي وألمك الكتير بيخليك تحس اكتر بالسعادة.
4- فكرة الشحاعة في الحب: مفيش مانع لو حبيت واحدة تقولها ولو فشلت مع واحدة تسيبها وانتى كمان متخليش الحياة الزوجية تستمر لمجرد انك خايفة من كلام الناس لان الناس مش هتنفعك لو كل يوم بتنامي ودمعتك على خدك.
5- فكرة ان شعبنا مبيعجبوش العجب، لو الكاتب جاب نهاية حزينة هيقولوا عليه كئيب وسد نفسنا، لو جاب نهاية مفرحة هيقولوا عليه تقليدي ولو جاب نهاية مفتوحة هيقولوا مبنحبش النهايات المفتوحة مبيرسيناش على بر، فالكاتب جبلكوا كل النهايات مع بعض عشان تستريحوا، ويرضي كل الأزواق.
6- فكرة ان احنا محتاجين لتغير اسلوب التعليم للمناقشة والتفاعل بين الطلاب والمعلمين عشان المعلومة تثبت ، مش احقظ يا واد وسمع يا واد حيث قمة الملل.
7- فكرة خلاص احنا زهقنا من القديم واللت والعجن لازم الروايات الحديثة تجدد والروايات اللى هتنجح الفترة الجاية هي المبتكرة اللى بتغوص في اعماق النفس بإسلوب جديد
7- ليا عتاب على الكاتب : اللغة بقى الناس هتقولك كاتب بالعامية ليه؟ ماله العربي ، بس انا متهيقلي ان دا مش عيب انا حسة انه عمل كدة عشان يوصل اسرع لاحساس الانسان وهو نجح في كدة، وانا عشان اوصل للكاتب كتبت بالعامية برده يلا، انا عندي عتاب خاص انه مرعاش ذوي الاحتياجات الخاصة امثالي، انا ذاكرتي ضعيفة في الاسماء والارقام فالاربع قصص دخلوا في بعض بس انا من الاول عملت ايه بقى جبت ورقة وكتبت: (أ)Xسلمى- رؤى (ب)Xدنيا -سارة (ج)X علا(د)Xمروة
وعشان كدة انا نويت اقرا القصة تاني وتالت بجد هتفرق كتير وعشان احس بيها اكتر وعشان هي تستاهل
فقراءة هيبتا مرة واحدة لا تكفي
ليست هناك تعليقات:
إرسال تعليق