هذا وقد قالوا لى ان بلاد العالم الأول بياكلو فيها باتيه، ولياليهم كلها مِلاح،وانا لما جيت هنا عندهم يا سعادة البيه، جالي القاولون و جتلي الأملاح، وحتى السكر ياباشا منعني من أكل البغاشا، ولقد حاولت كثيرًا بالتمتع بمزايا العالم الأول لكن النقرس عليا طول، ورغم النظافة والنظام ، لقتنى من الكالو مش عارف أنام، وهنا الخروج والفسح حتى الهوا عايزين مبلغ وقدره، وأنا جيبي ربك أعلم بسره، في الشارع من بعيد ممكن تشوف الفراري، لكنك انت فقري أراري ، هتروح فين يا صعلوك بين الأغنيا والملوك، لا صنعة تنجيك وربك اعلم بيك، قالولى البلاد الأولى حرة ، لكن الغربة مرة ، والبعد قاسي ، ووحشانى ناسي، انا جيت طالب العمالة لقيتنى في اسوأ حالة، ايوة والله ما بنكر الرزَّاق وفضله، لكن الانسان لسا بفقره، والمنحوس منحوس ، حتى في الدول ام فنوس، ايوة العيشة عالية، لكن الحياة هنا غالية ، اللى بتاخده باليمين بتصرفه بالشمال، وقال ايه الحياة عال العال، وكل دا يا حضرات ومش هتسلم من عين الستات القرارات، ايوة دا مسافر وقابض، ايوة تلاقي حياته كلها فرفشة ، وانا صدقونى من كليتى بنام بدري من العشا، وبما انك بتشتغل عند الكفار ، فبيطفحوك الكوتة زي الحمار ، مفيش اجازة ، حتى لو العملية في الشغل ممتازة، يا تروح الشغل يا تطلع على القرافة، مفيش اى حل تالت ،يا إما ترجع تانى للعالم التالت، غير انك بتوحشك حجات كتيرة زي البطاطا والبليلة، وبشاميلي طنط سعاد ، ومحشي عمتك اعتماد، واكلى بقى نواشف وشريطي من التعب سافف، فين ايام زمان ايام الترمس والدرا المشوي والفول بتوع الصبح بدري، وحشونى الاحباب ولمة الصحاب والبت جارتنا بنت ام رحاب.
طب خلاص رجعوني ومن الصبح سيبونى،
وانت فاكر ان دخولك الحمام الأول زي خروجك، البلاد دي مهرها غالى والطلاق منها أغلى ، فين المؤخر والعفش من الإبرة للحلة ، والله انا يا سيدي عاملت الولية بكل حنية بس هي اللى افترت عليا اتاري العالم الاول نضيف اه بس قاسي، غنى اه بس انا بقاسي ,
وبعد التحية والسلام احب اقول لطنط ابتسام انى كويس وكله تمام، ايوة خليهم فاكرين انى هنا متهنى لحسن يزعلوا عليا او يزعلوا منى .
ليست هناك تعليقات:
إرسال تعليق